ائوده بیر ایل آه چکرم خبر یوخ
ائودن چیخام من او یانا یار گلی
تای توشلاریم چوله چیخا گون چیخار
من چیخاندا یاغیش گئتسه قار گلی
یازیخ گوزوم آجلیغا دوز داریخما
بوگون - صاباح باهار گلی بار گلی
بیزه گله - گلمیه بیر کال ایده
قونشوموزا هیوا گلی نار گلی
خان ائوینه شیر گلی قویروق بولار
بیزم ائوه کور ایت گلی هار گلی
خلقه قوناق گلی گوزی سورمه لی
بیزیم ائودن کور گیتمه میش کار گلی
بختیمه آرواد نه چیخا بیلمیرم
بللی دی کی سارساغا سوسار گلی
بیر "اوچ اتک" اندازادی اگنیمه
"سالیس بوری" گن گلمه سه دار گلی
دولتیه یاس دا گله اوینایار
بیز کاسیبا طوی گله آخسار گلی
غم یوکونن کدخدا نین حصه سی
خردل اولی بیزیم کی خالوار گلی
کده بیزی دویلله بیر هاوار یوخ
بیز بیر کلمه حق دانیشاق جار گلی
دارغاشاییدلار بیزه سرکار چیخار
داردیبینن قورتولا سردار گلی
بوندان بئله اؤزگه گورم اؤزکه دن
منت چکیر غیرتمه عار گلی
ایشچی تویوق کسنده من باخانمام
بیلمم نجه اؤرگینن وار گلی
غم دن منیم بیر عینک وار گوزومده
ایشیق - آیدین گون گوزومه تار گلی
عشقیم دوشوب یادیما گوزلر داشیر
باهاردا سئل آتلانی چایلار گلی
چوخ شاعیرین طبعی دونار بوز کیمی
شهریارین شعریده قاینار گلی
سلام